關淑怡 SHIRLEY KWAN - EP 2006

 #不走世人都愛走的路

劃時代嘅《eZone》於1998年推出，多年嚟完全聽唔出歲月流逝嘅痕跡，當中歌曲比後世好多製作更精良嘅作品都要前衛，將關淑怡嘅聲音同名字深深印喺樂迷心入面。事隔八年，佢終於再現身，喺2006年推出只有四首歌嘅同名EP《Shirley Kwan》再踏樂壇，曲風貫徹退隱前嘅迷離、另類。雖然新碟嘅佢已經四十歲，聲音點都同錄《eZone》時三十一歲嘅顛峰狀態有距離，但歸隱多年並未久疏戰陣，技巧搭夠之下極具個人特色嘅咬字同氣聲仍然歷久如新。

呢張彌足珍貴嘅EP裡面，黃偉文為Shirley度身訂造咗兩首歌。「一睡半年，睡了更加累」，〈進化論〉寫從冬眠中甦醒嘅狀態，編曲以寧靜空蕩嘅意境為主，加入大量和聲做襯托同轉折，filter過嘅歌聲仿如自世外傳來，標誌住傳奇歌姬喺天地之間嘅重生。詞人不但憑歌寄意鼓勵歌者「慢慢割破夢魘，出去吧」，好好再發揮，亦有借機頌讚歌者嘅音樂係「如早春一下驚雷」。

〈關於我〉係一首效果比較混雜嘅作品。歌詞確實切中關淑怡多年嚟一直承受住傳媒同大眾嘅無意義負面批評，厭煩不滿甚至困擾都一定會有，不過一一書寫出嚟做成一首歌去回應，歌曲中段仲要一輪嘴咁樣搶白，就唔型囉。明明Shirley咁多年都好少攤出嚟講，點解復出時要用呢個咁切身嘅題目去做文章？將「我」放到咁大，其實更似係詞人本身睇世界嘅角度，亦同關淑怡做嘅遠離繁囂嘅音樂有少少背道而馳。但呢首歌本身係冇問題嘅，而且因為劉諾生將編曲做得異常豐富，幾把關淑怡嘅聲音輪番上場質問「你覺得真的有份嗎？」令歌曲變得相當精彩。

雖然兩首新歌都有一定份量，但論成張碟最出色嘅作品，仍然係九年前已製作好嘅〈帶我去跳舞〉。巧妙插入喺荒蕪中再生嘅〈進化論〉同七嘴八舌滔滔不絕嘅〈關於我〉之間，係一趟星際旅程。綿密嘅鋼琴前奏清脆脫俗，飄渺嘅歌聲喺如歌劇般共鳴不斷嘅和聲之下滑出來，有如帶領我們騰雲駕霧飛往太空。「華麗宇宙，共你飛渡，天際閃爍的航道，一轉身已經變得太荒蕪」，彷彿站於銀河上回望地球，目睹「人間百萬年」，明白「一生不過小半天」，一切愛恨爭鬥變得渺小而不再重要。〈帶我去跳舞〉係1997年為商台廣播劇【新人類年代記】錄製嘅主題曲，卻一直未有對外發行，呢次正式收入唱片裡面，令一首咁精彩嘅歌重新出土為世人所認知，非常好。作曲嘅郭靜係當年903 DJ，寫過彭羚〈未完的小說〉、鄭秀文〈時間、地點、人物〉等廣播劇歌曲，都係小品風格，呢次由陳嘉樂編曲，華麗轉身成人間世外嘅音樂，行得甚至比《eZone》更高更遠。即使嚟到二十四年後嘅2021年，〈帶我去跳舞〉嘅前衛精彩仍然未有退色，一樣係獨特而grand嘅頂尖廣東歌作品。

----

【2006年2月8日】

　關淑怡推出第二十張專輯《Shirley Kwan》EP

----

https://youtu.be/kbEWIZ-jUyU

關淑怡 SHIRLEY KWAN

#廣東歌

#廣東歌好日子 #2月8日

----

其他好日子：

　非愛不可 https://tinyurl.com/i4ap6qnd

　為何是我們 https://tinyurl.com/1w2kh3vt

　夜迷宮 https://tinyurl.com/5aer9a2o

　瞬間情迷 https://tinyurl.com/w9i39r47

— in Hong Kong.

真的，只有她的声音能够带我飞出这个宇宙，遨游无边无际的外太空

2021.01.24 只要讓我有感覺 [eZone]

#只要讓我有感覺

賺錢個個都想，但貪得無厭到將約滿歌手用心製作嘅完整唱片拆件出售，意圖強行延長收成期撈多一筆，視音樂如無物，就過分咗。香港樂壇史上有三張優秀專輯就係咁樣慘被肢解，行兇嘅唱片公司分別係新藝寶、寶麗金同Music Plus，死者係王菲《敷衍》、關淑怡《eZone》同陳奕迅《I Had A Great Time》。前兩者年前先後推出復刻版，遲咗二十年，至少得以原初嘅曲目順序示人，後者就不知何年何日至有得破鏡重圓。

呢三張碟當中，又以《eZone》當年嘅分解最為可惜，因為經歷過《My Way》嘅轉型摸索、《Ex All Time Favourites》嘅成熟綻放同《世途上》嘅偏鋒探尋，《eZone》本來應該係關淑怡嘅蛻變終於修成正果嘅一步，得以最顛峰嘅聲音、技巧，最具靈氣嘅姿態去呈現自己所嚮往同鍾愛嘅音樂，甚至可以成為一如林憶蓮《野花》般嘅經典傳奇。但呢一步就因為唱片公司嘅貪婪而被強行拆開成1997年《心靈相通》新曲加精選輯同1998年《eZone》EP兩部分。

雖然未竟全功，只收錄六首歌嘅《eZone》仍然相當令人驚艷。〈薄荷氣味〉輕快節奏一出已經搶耳，周耀輝寫出相當切合關淑怡特立獨行個性嘅歌詞，串串地，自信而不妥協。Shirley招牌氣聲風格強烈，副歌更打破廣東話正音框框，歌詞隨住情緒變化翻山越嶺，咬字扭到出神入化，好似聽緊西洋Diva將英語歌曲唱到上天下地咁樣。

〈心全蝕〉由寫開華夏小調嘅蔡國權包辦曲詞創作，原本平凡尋常嘅歌曲得到Shirley神級演繹而重生，加上劉志遠神乎其技嘅編曲，砍掉重煉成充滿new age色彩嘅前衛作品。以機動性電子beat墊底，Shirley歌聲輕柔飄蕩於越趨強勁熱烈嘅拍子上面，「宇宙無極，難容納下小小一個我」一段唱得仿若太空迷航般有種難以言傳嘅浩瀚感，間奏及歌曲尾段靈動嘅adlibs真係「思想超出了軌跡」，好似瞬間滑過宇宙嘅神奇力量。第三次出現嘅verse去掉一直躍動嘅節奏，以放慢步伐重整思緒嘅方式重唱第一段歌詞，變得實淨嘅聲音改唱陪襯嘅和音聲部，同第一次唱主音時靈巧飄逸咁「墮入飄渺的世界」完全唔同感覺。

〈大地之母〉又係另一個驚歎。當2012年林憶蓮至用晦瀝難懂嘅國語文字堆砌出隱含憤怒嘅〈蓋亞〉，1997年關淑怡已經唱緊黃偉文用廣東話寫成嘅〈大地之母〉，將地球對人類嘅憤怒同失望非常直白地表達。相較於林憶蓮咬牙切齒嘅搖滾腔口，關淑怡以只此一家嘅獨特扭音唱法將熟悉嘅廣東話變成感覺陌生嘅語言，配合大地之母原始而神秘嘅身分。華麗明艷嘅音樂喺背後默默滋長，任由Shirley出塵嘅氣聲喺幕前飄逸狂舞，將神話般嘅末日預言吟唱出嚟：「若我倒下，萬里無花，荒土滿目，不可悲嗎？」意在言外，歌曲流露出未有直言嘅深沉哀傷。

「愛難尋，愛情似星和浮雲」讀起嚟感覺好老土，出自一味量多而甚少佳作嘅向雪懷手筆，但Shirley將如此文字拆解重構，由verse細微低迴嘅吞吐咬字，到chorus洶湧而出充滿氣勢嘅氣聲，交織成神秘而具層次嘅〈愛難尋〉。「彼此不要羨慕，其實各有苦惱」同樣由向雪懷所寫，Billy Chan編曲時加入充滿格調嘅色士風，同Shirley嘅特別唱腔好相襯，彷彿為〈羨慕〉多添一重超然世外嘅色彩。

〈非愛不可〉係呢張碟我第一首愛上嘅歌，而且係第一次聽已經很愛很愛。經過整張碟如幻似真嘅宇宙遊歷，劉諾生嘅編曲既似從夢境甦醒、意識重生，又似虛妄過後再次腳踏實地，完全帶出歌詞「慢慢復甦心跳感覺」嗰種希望同活力。林夕寫愛情再來嘅時候，連「全部曾領教過」但又「記不起了愛情算甚麼」嘅歌者都重新對愛渴望。歌曲繼續運用大量和音backing，而且做出仿似歌者自己同自己對話嘅效果，悠揚嘅笛子注入更豐富生命力，關淑怡亦唱得特別活潑有生氣，尾段重複嘅do do do do da da da一舉掃走鬱悶，聽得人心情開朗，係專輯一個好圓滿嘅句號。

----

【1998年1月23日】

　關淑怡推出第十八張專輯《eZone》

2020.12.24 戀一世的愛

#時間會推你到這一天　#能見的終於都會見

如果〈夜迷宮〉算係釋放咗關淑怡野性嘅一面，〈梵音〉嘅出現就真係打破咗Shirley早期由寶麗金所塑造嘅流行歌手框框，開始向更深奧、更另類嘅範疇探索。〈梵音〉改編自法語歌，原唱歌手Amina聲音較厚實，低音共鳴感強烈，同充滿空靈感嘅world music風格編曲非常配合，好似聽緊啲原住民音樂咁；Shirley嘅聲音比較之下冇咁實淨，所以改編後嘅編曲亦做返摩登少少，以持續嘅鼓擊墊底做成較強烈嘅節拍，再用華麗弦樂替代結他聲，整體變得更有時尚感，反而帶出另一種味道。林敏驄喺呢首西洋旋律填上難以理解嘅東方佛偈，加上原曲都有不斷重複嘅「ooh啊ooh啊」、「hee吔hee吔」，撞出好得意嘅mix and match效果，成為呢張碟迴響最大、最能跨越時代嘅作品。

神秘嘅墊底拍子唔單止貫穿《戀一世的愛》專輯最後嗰首〈梵音〉，連一開始嘅〈戀一世的愛〉都有。明明首歌講分開後嘅懷念，理應傷感，不過主旋律嘅抒情音樂就被墊底嘅重beat搶晒焦點，兩者好似平行時空咁各有各去，但組合埋一齊又幾有型。Shirley喺歌曲開頭用深情聲音講咗幾句新寫嘅英語獨白，取代原曲嗰幾句西班牙語，令首歌散發出更強烈嘅歐陸時尚味道，同佢過往嘅情歌感覺好唔同。

專輯中多首快歌以派台嘅〈仍流着眼淚〉最突出，密集而富壓迫感嘅節奏比其他舞曲有個性，Shirley亦唱得更得心應手。〈為何是我們〉改編自美國歌手Vanessa Williams嘅代表作〈Save The Best For Last〉，林敏驄寫出連句式都西化嘅歌詞，「為何最後會是我們」好明顯係英語直譯做中文。呢首終於擺脫墊底電子beat，行傳統ballad路線，即使編曲平平無奇，喺Shirley靚聲演繹之下仍然令人留下印象。

----

【1991年12月23日】

　關淑怡推出第八張專輯《戀一世的愛》