人生中第一個入場睇嘅紅館演唱會，係【難得有一個關淑怡演唱會】。當年個性特立獨行嘅Shirley仲會乖乖同唱片公司合作，首次個唱亦順理成章有齊傳統紅館騷嘅基本規格，例如懶有氣勢嘅開場〈星空下的戀人〉，例如直落連場快歌排晒舞嘅〈夜迷宮〉、〈Dela〉到〈親愛的〉，例如不斷換靚衫，例如假ending後再出假encore離場都要離幾次。
但Shirley嘅演出亦有佢與別不同嘅色彩。例如佢喺有晒走位兼需要借助機關嘅正式開場之前，毫無花巧噉隨意行出嚟坐喺台邊「送三首歌畀大家聽先」，一嚟就唱咗唔知點安置好嘅〈患難建真情〉等慢歌，既滿足樂迷又唔會搞亂後面嘅編排。最破格嘅係演唱〈製造迷夢〉、〈緊張〉、〈梵音〉同〈驚世感覺〉呢幾首風格另類嘅作品時，透過編曲同獨白將關於真實同虛幻、生與死、既視感、輪迴、迷離夢境等內容串連，一群裝扮有如孕婦嘅舞蹈員持續走動、掙扎，構成舞台上嘅詭異景像。成個演出首推呢幕最特別、最值得重溫，可惜無論係演唱會CD抑或DVD都冇收錄呢個部分。
節奏高壓、歌詞密集嘅〈緊張〉，迷幻如人間世外嘅〈驚世感覺〉，呢兩首充滿個性嘅佳作都嚟自1994年7月8日推出嘅大碟《My Way》。同碟仲有明明寫嗰陣係慢歌但編曲後變成拍子好䟴嘅舞曲〈逝去的傳奇〉、浪漫深情嘅經典〈繾綣星空下〉、清新出塵嘅〈窗內窗外〉等優秀作品，每首都相當獨特，我卻最鍾意充滿禪意嘅〈平靜裡的一盞燈〉。
作為林敏驄繼〈梵音〉同〈眾心〉之後第三首寫畀關淑怡嘅佛偈，相對前兩首聽到人莫名其妙雲裡霧裡，〈平靜裡的一盞燈〉嘅歌詞算係較有條理，雖仍難以完全明白每字每句，但能約略知道個大概，有可以領悟參透嘅確實方向。歌曲旋律本身搶耳，尤其副歌嘅輕鬆愉快，會令人想跟住大唱「虛空，虛空，輾轉裡覓尋」，C段情緒突然轉折而收慢，多添半分玄妙，同關於因緣嘅主題相配合，「今天所種總會發生」，因果將一直天理循環。
〈平靜裡的一盞燈〉同〈緊張〉、〈驚世感覺〉一樣相當冷門，但Shirley喺【難得有一個關淑怡演唱會】上亦有選唱。唱片版本嘅編曲最後將首歌fade out，除咗係九十年代常見手法，亦配合歌曲墮入凡塵一再重複經歷嘅意思。演唱會現場音樂無法fade out，但人可以逐漸消失：最後一段Shirley邊唱邊往台下降，當佢大半個人已沉入台底，隨住最後清唱嗰句「平靜裡的一盞燈」而終於消失台上。呢個處理實在令人好深刻，咁多年嚟亦冇喺第二個演出上見過。
----
【1995年6月9至12日】
關淑怡舉行第一次紅館個唱
【難得有一個關淑怡演唱會】
