1998.02.10 專訪沉默兩年的關淑怡:「我決不復出!」

[東TOUCH]

兩年前，關淑怡錄了一張大碟共9首歌後便與寶麗金約滿。自此退隱江湖。兩年的日子，差不多全港唱片公司都斟過她，但頂多係某某高層說開幾千萬斟唔成，又或某某高層說條件苛刻簽唔成。於是，關淑怡簽邊間唱片公司成了一個極難估的謎語，唔知等幾耐至有答案。
結果，98年接近情人節的日子，一隻名為<<關淑怡全新EP>>的唱片推出。一出惹來反應，個個以為Shirley，重出江湖出新唱片。惟獨Shirley有點苦惱:「唔該睇下個Logo。」兩年前的作品被誤為98新唱，沉默兩年的Shirley終於肯俾個面做獨家訪問揭開謎底。

「同寶記點會無偈傾。」

E.T.:寶記最後大碟9首歌分3次面世，首先係<<非愛不可>>斬件俾一半陳琪變成合唱歌，然後用3首歌推出<<新歌+精選>>，到今日用餘下的5首出EP。點睇?同寶記關係如何?

Shirley:前幾日我見到德哥。我在GrandHyatt的CoffeeShop與一間唱片公司人員偈傾，第一時間行埋去豆利是添呀!其實，大家識咁耐，點會無偈傾。就你講的問題，我唔會覺得好唔開心，我明白到唱片公司有佢既處理方法，公司鍾意點做都無所謂，反正我已錄好首歌，且由揀歌到錄音我無俾過任何意見。

「寶記向來唔鍾意我俾意見。」

E.T.:唔俾任何意見非你的作風?

Shirley:因為寶記向來唔鍾意我俾意見。可能當時好少歌手Involve落張唱片，任由監製決定，我去參與開會令公司好詫異，佢地認為歌手只須聽監製指示唱好歌，俾意見係超越自己範圍既事。

直至94年開始，公司開始接受我既做法，我同監製葉廣權都合作得好好，但到呢張(即寶記最後一張)唱片，我用行動去證明對公司的信任，我不加任何意見在這張唱片內，從揀歌到錄音放手任佢地搞。結果係公司立場當唱片係個Product,但我唔想用Product眼光對待，我好想Achieve一D理想，我覺得音樂好偉大，好似Painting,唔需要任何字，首歌可以帶出好多情緒，起伏，感受到不同的故事，好豐盛，有Mood。我想唱有意思的歌，但當我對音樂的認識廣闊左，覺得需要轉變卻又找不到方向，於是我Stop，停一停俾自己抖一口氣，抽身出來離開做了近7年的娛樂圈，體驗生命一直是一種成長的心態轉變，很難用三言兩語去達到。

「走去同人逼電車。」

E.T.:兩年的悠長假期過得怎樣?

Shirley:以前事業就係我生命。現在，明白到生命有屋企，友誼，愛情，去畫下畫，做一些怡情的事，過平凡人的生活。走去同人逼電車，坐上層覺得好舒服，仲覺得好浪漫。LiveMyLife好開心。感覺同以前多姿多采生活截然兩樣，好似做大圍記者訪問個個似趕搭車，哈哈。

E.T.:無賺錢，生活費夠唔夠用?

Shirley:我夠慳嘛!哈...我一向有儲蓄習慣，近年又唔買衫，唔使上台唔使著咁誇呀!又無奢侈嗜好，託賴屋企做生意我唔需要負擔，點會無錢使呀?不過我好有骨氣架唔會攤大手板問Daddy羅架。

「傳聞流過流口水呀!」

E.T.:到底你簽邊間唱片公司呀?傳足兩年依然無著落?

Shirley:唉，你聽D傳聞流過流口水呀!我都未簽。傳聞講我條件高，好難做到之類，根本我無開條件，只係要求宣傳唔好多到泛濫，價錢亦無報道所講咁誇張。唉。不過我唔會作任何回應，由得佢地講啦。

E.T.:幾時復出呀?

Shirley:我唔會復出架!

E.T.:o下?

Shirley:我都無收山，唔使復出呀!哈哈哈...........
唔好問我幾時真真正正出新大碟，因為我都預計唔到，一日未簽約未正式錄音都唔知。呢一刻，我已經有個雛形，知道自己方向係點，正積極練好國語。

拍《春光乍洩》只得五萬蚊

行內個個吹關淑怡叫價太高所以無唱片公司斟價。但其實Shirley一D都唔貪。記得Shirley拍《春光乍洩》去阿根廷足足拍左1個月，所收的片酬只係$50,000港銀，登台都唔止呢個價，但Shirley為興趣無計較。
跟Shirley說起，她不悅道:「咁舊，唔好提啦!」

不提也罷!戲為興趣而拍，收了一個俾面價，結果辛苦捱了1個月，上映時，戲份被剪過點滴不存!唉............

後記:

Shirley對於兩年來首次做雜誌專訪顯得極不習慣。

攝影師叫她到街上影相她擰頭，攝影師叫她站著好快影幾張，她猛說不好，結果當然沒有強她所難，就連反光板，一打開，她也嚇親:「嘩，好耐無見過，好唔習慣。」

可幸，做訪問Shirley金口大開，不像她事後來電說:「其實你問咁多野一句答晒:就係覺得應該咁做咪做羅!明就明，唔明都無辦法。」

1998.01.20 關淑怡新碟重見天日

被寶麗金雪藏多年的關淑怡舊作終於可以重見天日, (新歌)"羨慕"已經派上台，新碟將會以EP形式推出，收錄"羨慕"，"薄荷氣味"，"心全蝕"，"大地之母"，"愛難尋"及"非愛不可"，1月23日上市。

---

關淑怡低調出新碟
[娛民日報]

像是人間蒸發了一樣的關淑怡，年多兩年沒有出碟，卻突然有新碟買廣告，但卻十分低調。原來是寶麗金最後一張大碟。
據說，關淑怡雖離開了寶記一年多，但寶記曾想她出來宣傳，怎知她怎也不肯，結果只好低調地宣傳。這張是EP，共有六首全新歌曲，將於日內面世。

---

關淑怡貨尾草草出街寶麗金低調宣傳唔計賺蝕
[東方日報]

在樂壇失蹤近年的關淑怡，自九六年約滿寶麗金後，一直有消息傳她會加盟別的唱片公司，但一直只聞樓梯響，遲遲未見有實質公布。
無聲無息出新碟

近日，在一些報章雜誌，出現關淑怡廣告，在無聲無息之下再出唱片，但這張新碟並非由她新加盟的唱片公司推出，而是寶麗金和關淑怡約滿時仍未出街的一張碟，亦即是關淑怡在寶記的最後一張唱片。

這張關淑怡在寶記的最後一張碟都草草了事，碟內只灌錄了六首新歌，而這六首歌又全都是以前關淑怡用剩未曾收錄的歌，今次卻一次過收錄在這新碟內。

關淑怡拒做宣傳

該 張於明日推出的新碟，宣傳可說非常"求其"，只刊登了少量廣告。據知，寶記本來也不想咁"求其"，曾想搵關淑怡親自做一些媒界宣傳，但可惜關淑怡講明不會 為該碟做任何宣傳，除了不接受報章雜誌記者訪問，連電台，電視台亦一樣無面俾，所以寶記對這張碟心灰意冷，已不在乎這張碟的碟的賺蝕，只求為關淑怡出埋合 約規定的一張碟，故此索性連廣告費慳得就慳。

淑怡約滿後一年才出最後一張碟，而且製作又咁"求其"，寶記發言人王凱文表示:「無辦法啦，我地都想搵她重新錄過新歌，但佢走左咁耐，佢唔做宣傳，我地都唔會迫佢，其實一張碟賣唔賣得，好靠歌手親自出黎宣傳，依家惟有賣多D廣告囉，我地都會照一般碟咁賣廣告。」

1998.01.08 關淑怡復出-掀起爭奪戰

[東週刊#272]

自從跟寶麗金約滿後，關淑怡鮮有公開露面，到底Shirley呢排忙D乜?據聞，早前叱吒樂壇頒獎禮，便曾經邀請Shirley出席十周年文藝晚會，負責演繹一首殿堂至尊歌，不過，近期非常低調的Shirley，有感自己仍未有新動向，既然不想見記者，還是婉拒了商台的好意。
台灣出銀彈攻勢

不過，據可靠消息透露，關淑怡過了年多優哉悠哉的生活後，其實已經部署了在九八年年中，再次在樂壇出擊，且今次唔單止係香港市場，更要打入東南亞市場。其實，一直都有多間唱片公司跟關淑怡接觸，不過，經歷過樂壇轉變的Shirley，對於重返樂壇非常謹慎。一心要拓闊自己音樂領域的Shirley，一直對香港唱片公司缺乏信心，反而更樂意跟台灣唱片公司合作。而兩間大規模的台灣唱片公司，近期正展開一場爭奪戰，它們分別是台灣華納唱片及台灣EMI唱片公司，兩間公司都財雄勢大，同時採取銀彈攻勢。這陣子，兩家台灣唱片公司的高層，便要經常飛到香港與Shirley接觸，希望簽得關淑怡成為旗下猛將。

重續前緣

不過，另一方面，台灣華納有消息傳出，香港華納董事總經理李進，有機會接管台灣華納唱片公司，這麼一來，Shirley便很可能跟李進有合作機會。據內幕消息透露，早於李進簽鄭秀文之前，便曾經與關淑怡有過接觸，當時關淑怡十分欣賞李進，惟兩人最終仍未有合作。世事難料，今次Shirley與台灣華納唱片公司接洽，竟意外地與李進重逢，未知多年後的今天，Shirley會否與李進合作成功呢?

不過，作為一位歌手，經常要親自傾談合約，始終不大方便，Shirley一直想找一位合適的經理人幫忙。據聞，Shirley正計劃簽老友鬼鬼的張學潤(湯寶如經理人)為經理人，在九八年齊齊打天下。