2013.07.08 關淑怡壓軸滿面油光

近年甚少新歌的女歌手關淑怡再度亮相《勁歌》優秀選，並憑翻唱陳奕迅的歌曲《陀飛輪》得獎，壓軸出場的她身穿紅色上衣露出手臂，見她狀態甚佳但略嫌滿面油光，而她獻唱時繼續保持一貫風格，將舊版演繹成柔和慢版，可惜有幾個高音位接近破音邊緣，有點美中不足。


關淑怡憑翻唱陳奕迅的《陀飛輪》奪獎。



Video:

2013.07.08 電視撈飯--胸贏薛凱琪 鄭融：我少布啲最乖

[蘋果日報]

無綫雖然同四大唱片公司破冰，但有好多歌手仍然唔肯同無綫簽歌手合約，所以冇機會去勁歌頒獎禮攞獎。久違嘅關淑怡舊年年尾同無綫簽約，仲幫佢哋唱劇集主題曲，有傳佢今年同容祖兒爭女歌手獎。前晚佢哋一齊現身將軍澳電視廣播城參與《2013勁歌金曲優秀選第一回》，今年無綫又改賽制，由三回變兩回，入選歌又由14首加到20首，入圍歌手包括鍾嘉欣、黃宗澤、鄭欣宜、許廷鏗等無綫「御用歌星」，而以前四大嘅薛凱琪（Fiona）同謝安琪（Kay）因為轉咗唱片公司，終於再有歌入選《勁歌》，無綫契仔林峯因要返內地拍劇缺席，但仍憑《Nice》入圍，再一次打破唔到冇獎嘅慣例。有份得獎嘅鄭融同Fiona都着得好性感，大騷事業線，鄭融話：「無綫話今次係summer party，我着少布啲最乖。」

祖兒關淑怡爭獎
祖兒前晚有兩個半獎成大贏家，但就冇機會參與台灣金曲頒禮獎，反而G.E.M.有份競逐歌后，祖兒酸溜溜話：「唔失望，呢樣要天時地利人和，人哋有我唔制咩？知自己放咗幾多時間喺國語碟。」問佢會唔會效法G.E.M.同林宥嘉喺紅地毯上手拖手，佢話：「等佢（劉浩龍）角逐先，有咁機會又唔錯。」怕唔怕關淑怡呢位對手？祖兒話：「佢喺我心目中一直係最受歡迎女歌手。」
另有讀者話無綫呃人，宣傳講明請到韓國組合EXO同埋SJ-M嘅Henry等表演，點知原來係播片，令粉絲好失望。《勁歌》監製麥鎮東噚日喺電話解釋：「佢哋7月1號嚟香港做騷，係專誠拍片。」

關淑怡自從同無綫簽咗歌手合約，即刻有歌入圍優秀選第一回。

2013.07.06 關淑怡《勁歌》狙擊祖兒

[蘋果日報]
 
無綫《勁歌金曲優秀選第一回》今晚喺將軍澳電視廣播城舉行，據知金曲獎增至20首，得獎歌手包括關淑怡、容祖兒、羅力威、蔡卓妍、林峯、林欣彤、謝安琪、鄭欣宜及蔚雨芯等。另外三首國語歌獎就由祖兒、鍾欣桐同糖兄妹奪得，祖兒加埋同羅力威嘅合唱歌，獨攬兩個半獎成大贏家。關淑怡憑《陀飛輪》一曲獲獎，消息指年尾《勁歌》總選，關淑怡有望同祖兒爭女歌手獎，打破年年由祖兒得獎嘅悶局。
撰文：馮仁昭